CEBU, Philippines — Wala na makaabot pagsugat sa Bag-ong Tuig ang 50 anyos nga babaye human kini nadasmagan ug nadasok sa ilawom usa ka armored van diha sa dalan Colon sa Barangay Sto. Niño sa Dakbayan sa Sugbo kagahapong adlawa.
Giila ang biktima nga si Fatima Lumabao nga taga Dakbayan sa Marawi didto sa Mindanao.
Matud ni Police Corporal Jesse Olano imbestigador sa Waterfront Police Station nga paingon unta sa uptown area ang armored car nga gimaneho ni Ricardo Sabellano Jr. nga taga dan V. Rama ning dakbayan.
Samtang nagmaneho si Sabellano nga nagsubay sa dan Colon wala niini mabantayi nga nilabang si Lumabao.
Tungod kay limitado ra ang makita sa armored car wala gyud makita sa drayber si Lumabao nga nilabang sa dan tungod pipila nalang ka metros anaa na usab ang pedestrian lane.
Grabi usab ang pagbasol si Sabellano sa nahitabo ug nangayo og pasaylo ngadto sa pamilya ni Lumabao.
Gibutyag usab ni Sabellano nga andam makig settle ang ilang habig ngadto sa pamilya. Gipasalig nila nga mohatag sila og tabanag pinansyal ngadto sa pamilya ilabi na sa pagpalubong niini.
Gisulayan og tawag sa kapolisan ang pamilya ni Sabellano ug giingong nakurat pa sila kun nganong naabot dinhi sa Sugbo.
Tungod kay ang pananghid niini ngadto sa mga anak sa Marawi nga moduaw ngadto sa kaulohan.
Nakaangkon og mga samad sa tibuok lawas ug ulo ang biktima ug tungod sa kadaot sa nga nahiaguman giingong nagka- cardiac arrest kini ug namatay.
Sa pagkakaron gipaabot nalang sa kapolisan ang pamilya sa biktima nga moanhi sa Dakbayan sa Sugbo. /IBM (BANATNEWS)