Gwardiya giimbargohan sa armas ug gigapos

CEBU, Philippines — Usa ka gwardiya giimbargohan og armas ug gigapos sa mga tulisan kinsa nitulis sa tindahan nga iyang gibantayan niadtong Sabado sa kadlawon diha sa Barangay Poblacion 3, Dakbayan sa Carcar.

Si Police Corporal Argie Noel Espinosa, desk officer sa Carcar City Police Station nibutyag nga upat ka wala mailhing lalaki kinsa sakay og duha ka motorsiklo ang niabot sa World Wide Depo ug dayong tion og armas ngadto sa gwardiya nga si Henry Jones, 48-anyos.

Matud ni Espinosa nga giimbargohan sa mga tulisan si Jones sa iyang service firearms nga kalibre .38 revolver ug gigapos hinungdan nga wala kini nahimo.

Human og gapos kang Jones nisulod dayon sa tindahan ang mga tulisan ug nanghakot sa mga butang. Nadala sa mga tulisan ang duha ka grinder nga nagkantidad tanan ngadto sa P12 mil, usa ka circular saw nga nagkantidad og P9 mil ug P63, 619 nga halin.

Ang kapolisan sa siyudad nagpahigayon og follow up nga imbestigasyon sa maong insidente. (/BDB)(BANATNEWS)