CEBU, Philippines — Nikabat sa 100 ka bata ang nalingaw ug nabusog sa gihimo nga Police and Partner Act of Kindness for the Children in Talisay (PACT) diha sa Barangay Tanke, Dakbayan sa Talisay kagahapon sa buntag.
Si Police Major Gerard Ace Pelare, hepe sa Talisay City Police Station nibutyag nga ikaduhang higayon na nila nga gipahigayon ang maong programa diin ilang tumong nga ang mga kabataan mapaduol kanila ug dili sa mga dautang elemento.
Si Pelare nipasabot nga ang kabataan tungod sa kalinghod pa sa ilang panghunahuna delikado nga madani kini sa ilegal nga kalihukan.
Ang kapolisan nihimo og pamaagi nga mapasabot sa kabataan ang dili maayong epekto sa ilegal nga drugas.
Ang mga batang nabiyaan sa ilang mga ginikanan tungod kay nasikop kini sa pagkalambigit sa ilegal nga drugas ang kasagarang naapil sa maong programa sa kapolisan.
Si Mayor Gerald Anthony “Samsam” Gullas, Jr. maoy nahimong sponsor sa pagkaon sa kabataan ingon man sa paghatag og pahalipay. /BDB (BANATNEWS)