CEBU, Philippines — Ipahigayon karong adlawa sa Philippine Coast Guard (PCG)-7 ang sea crash exercise inabagan sa Mactan Cebu International Airport Authority (MCIAA), Maritime Police, Armed Force of the Philippine (AFP), Philippine Red Cross (PRC) ug Local Disaster Risk Reduction Management Council (LDRRMC) sa Dakbayan sa Lapu-lapu.
Si Lieutenant Junior Grade Michael Encina, tigpamaba sa PCG-7 nagkanayon nga labing unang higayon nga adunay himuon nga sea crash exercise lukop nasud diin anha kini ipahigayon sa Magellan Bay, Barangay Mactan sa naasoy nga siyudad.
Giingong atol sa simulation exercise adunay dummies nga i-instolar daan diha sa incident area nga magsilbing biktima, airplane debris aron duol sa riyalidad ang ilang himuon nga kalihukan.
Sa nahisgutang simulation exercise upat ka importante nga mga lugar ang ilang tutokan nga naglangkub sa Command Center nga mahimutang Terminal 2 sa MCIA, incident command post sa shoreline sa Magellan Bay, medical area sa Cebu Yacht Club ug kataposan ang incident area sa nahimutangan sa barko sa PCG ingon man ang mga responding assets.
Subay sa maong kalihukan ang PCG-7 mopakatap og usa ka coast guard vessel ug walo ka gagmay’ng floating assets ug ang Maritime Police mopadala usab og usa ka speed boat.
Giingong adunay usa ka coast guard medical team nga i-deploy ug ang Lapu-lapu City ug Red Cross aduna usab kini ilahang medical team sa kalihukan.
Gihulagway ni Encina nga ang maong sea crash exercise makatabang aron mas mapalambo pa ang ilang kahanas, kahibawo ug attitude sa pagresponde sa mga susama nga scenario. BDB (BANAT NEWS)