CEBU, Philippines — Mas gipahugtan sa Cebu Provincial Police Office (CPPO) ug Armed Forces of the Philippines (AFP) ang pagpatuman sa seguridad ug pag-monitor sa giingong padayon nga recruitment sa New People’s Army (NPA) sa mga batan-on atol sa gipahigayon nga Joint Peace and Security Coordinating Center Meeting. (JPSCC)
Matud sa direktor sa CPPO Police Colonel Rhoderick Mariano nga usa sa mga nahisgutan sa ilang panagtigom mao ang subli nga monitoring sa recruitment sa mga batan-on sa Probinsiya sa Sugbo.
Ug ang maong lakang gibuhat subay sa programa ug tumong sa gobiyerno ang paghunong sa terorismo sa nasud.
Usa na niini mao ang kalambigitan sa walhong grupo nga sagad nga ilang kumbinsihon mao ang mga mga estudyante o mga batan-on hinungdan nga gihingusgan sa kapolisan ug kasundalohan ang pag-monitor niini.
Hinuon sa pagkakaron bisan og gideklarar ang Sugbo nga insurgency free batok sa lokal nga terorismo padayon gihapon ang pagprotehir niini pinaagi sa information dissemination.
Gihangyo usab ni Mariano ang mga ginikanan nga tabangan usab ang kapolisan ug kasundalohan sa pag-monitor sa lihok sa ilang anak. (/BDB)(BANATNEWS)