CEBU, Philippines — Nagpadayon ang kapolisan sa ilang pakisusi alang sa pag-ila sa mga nagmaskara nga armadong lalaki nga nagsakay og motorsiklo nga nitulis sa gasoline station nga nahimutang sa national road sa Barangay Cansaga, Lungsod sa Consolacion.
Kini nahitabo alas 3 pasado sa niaging kaadlawon diin nasakiyo ang mokabat sa P180,000 nga salapi. Si Police Corporal Roel Aquino sa Consolacion Police Station niingon nga ang tulo ka tulisan nga kalit lang nahidangat sa lugar nagtaptap sa nawong ug gitionan og armas ang guwardiya nga babaye nga si Cherry Pangautan kinsa naglingkod sa gawas nga sa nahisgutang establisemento.
Matud ni Aquino nga nunot sa pagtion og armas sa guwardiya gimando sa mga tulisan ang pagbaklid ug gigapos ang mga kamot niini.
Giguba sa mga tulisan ang door knob sa pultahan dayong sulod niini sa buhatan.
Sa paglabay sa pipila lang ka gutlo ang tulo ka tulisan nagdali sa pagpanggawas sa buhatan sa gasoline station ug nagdali sa pagsakay sa gi-parking nilang motorsiklo dayong pabulhot sa pahilayo sa maong lugar.
Dugang ni Aquino nga nagtinguha karon ang ilang buhatan sa pagsusi sa closed-circuit television (CCTV) camera footage tungod kay daku ang ilang pagtuo nga makatabang kini kanila alang sa pag-ila sa mga nagmaskara nga mga lalaki. (/GMR)(BANATNEWS)