CEBU, Philippines — Dose ka mga tawo nga gipasanginlang nalambigit sa illegal nga drugas ang nadakpan sa Dakbayan sa Talisay ug sa Mandaue City sa managlahing anti-illegal drugs operations.
Sa gihimong buybust operation diha sa Sitio Libo, Barangay Mohon, Dakbayan sa Talisay kagahapon sa buntag nadakpan si Jerome Restauro,30, nga maoy subject sa operasyon ug nagpuyo sa maong lugar.
Lakip sa nasikop mao sila si Raffy Primor, 21 anyos nga taga Barangay Tanke; Eddiardo Villaver, 47; Lauron Sanchez; Anecito Cañedo, 40, pulos nagpuyo sa maong lugar.
Si Police Major Gerard Ace Pelare, pangu sa Talisay City Police Station nibutyag nga si Restauro ang gitudlo sa pipila ka mga ginikanan diha sa maong dapit nga maoy nagsige og pangsulsol sa mga kabataan diha nga magbisyo. Gawas pa sa maong mga reklamo, pirme na sab mogawas ang pangalan niini sa una na nilang mga dinakpan ug sa pagpaniid kaniya. Nakuha gikan sa mga dinakpan ang 13 ka gagmay nga pakete ug usa ka medium nga pakete pulos dunay sud nga gidudahang shabu. Samtang sa Mandaue City, lima ka motorista ang gidakop diha sa police checkpoint diha sa dalan A. Del Rosario sa Barangay Guizo sa Dakbayan sa Mandaue tungod sa pagdala og illegal nga drugas.
Si Police Master Sergeant Arthur Cuyos sa Presinto 1 sa Mandaue City Police Office (MCPO) miila sa ilang nadakpan nga mao sila si Clark Mark Gomez, 36, ug Monroe Velasco, 38.
Dugang nadakpan mao sila si Fred John Alaswaton, 22 , ug duha ka 17 anyos nga pulos taga Riverside sa Barangay Looc sa Dakbayan sa Mandaue.
Matud pa ni Cuyos napulo ka gagmay nga paketeng shabu ang ilang nasakmit sa mga suspek ug gi-impound sab ilang mga motorsiklo. Samtang nadakpan sab si Josue Cuestas, 29, taga Poblacion sa Dakbayan sa Carcar sa grupo ni Police Major Wayne Magbanua sa Presinto 3 sa Lapu-Lapu City Police Office (LLCPO) atol sa buybust operation.
Giingong napalitan kini og usa ka paketeng shabu sa kantidad nga P300 ug dugang 12 ka paketeng shabu ang nasakpan sa iyang posesyon. (/IBM)(BANATNEWS)