CEBU, Philippines — Gisakmit sa joint operation sa mga sakop sa Bureau of Fisheries and Aquatic Resources sa Central Visayas (BFAR – 7) ug National Bureau of Investigation (NBI) ang duha ka toneladang bayanan sa takubo nga P36 milyones ang kantidad gikan sa duha ka mga barangay sa Lungsod sa Cordova. Gidakop sab ang tulo ka mga tawo sa Barangay Catarman ug Barangay Day-as sa nahisgotang lungsod nga giila nga sila si George Oldama, Bebeng Oldama ug Rowena Tahanlangit. Ang maong matang sa mga kinhason makuha sa ilawom sa dagat ug gawas sa pagkaon niini, gigamit sab nga materyales paghimo og fashion accessories ang bayanan niini. Ang operasyon gipangulohan ni Atty. Tomas Enrile sa NBI-7 uban sa mga sakop sa Cordova police. Matud ni Enrile P18,000 ngadto sa P20,000 ang matag kilo niini. Ang bayanan sa takubo natural nga gasang ilawom sa dagat maong maapektaran ang balanse sa ilawom kun kuhaon.
Si Alfeo Piloton, direktor sa BFAR 7 miingon nga kalapasan sa Republic Act 10654 or an “Act to Prevent, Deter and Eliminate Illegal, Unreported and Unregulated Fishing” ang gibuhat sa mga dinakpan. “Giant clams are also protected under international policies, particularly listed under the Convention on the International Trade in Endangered Species of Wild Flora and Fauna (CITES) Appendix II,” tipik sa pamahayag ni Piloton.
Iyang giawhag ang katawhan pagsumbong diha sa ilang buhatan kun duna silay makitang nanguha niining maong matang sa mga kinhason. (/IBM)(BANATNEWS)