CEBU, Philippines — Nasikop ang lima ka suspetsadong pusher og shabu sa managkalahing buy bust operation sa City Intelligence Branch (CIB) ug City Drug Enforcement Unit (CDEU) sa Lapu-Lapu City Police Office (LLCPO) ug 12 ka motorista ang nadakpan atol sa gipahigayong checkpoint sa kapolisan sa Presinto 5 sa Mandaue City Police Office (MCPO) sa niaging gabii diha sa A.C. Cortes Avenue ug eskina D. M. Cortes sa Barangay Alang-Alang sa Dakbayan sa Mandaue.
Si Police Major Narciso Ababo sa CIB sa LLCPO niila sa ilang nadakpan sa Sitio Buyong sa Barangay Maribago nga mao sila si Joseph Amorin,35 ug Joeven Ceniza, 21, pulos nagpuyo sa maong dapit ug nakuhaan og 22 ka pakete nga shabu.
Nadakpan usab sa Purok Balanghoy sa Sitio Humay-Humay sa Barangay Gun-ob, Dakbayan sa Lapu-Lapu ang pusher og shabu nga si Wicheliazo Lepundolan, 46,nagpuyo sa maong dapit kinsa nakuhaan og P15,300 nga balor sa shabu, P1,000 nga buy bust money ug P500 nga gituohang halin sa ginadiling drugas.
Sa Barangay Punta Engaño nadakpan ang pusher og shabu nga si Aldrin Cañete, 50 ug Crisanto Suson, 37, diin ang duha nakuhaan og P9,860 nga kantidad sa shabu , P1,000 nga buy bust money ug P540 nga gituohang halin sa ginadiling drugas.
Samtang, ang 12 ka tawo nga gikan sa Dakbayan sa Lapu-Lapu nga nagsakay og motorsiklo ang gipangsikop usab sa kapolisan sa Prersinto 5 sa Mandaue City Police Office (MCPO) human sa masakmit gikan kanila ang pito ka gramo nga kinatibuk-ang timbang sa gidala nilang shabu. BDB (BANAT NEWS)