CEBU, Philippines — Liboan ka beneficiaries sa nagkadaiyang programa sa Justice Peace Integrity of Creation-Integrated Development Center Incorporated ang nitambong sa ika-20 nga anibersaryo kagahapon sa buntag.
Kini gisugdan sa usa ka Santos nga Misa sa simbahan sa St. Arnold ug St. Joseph sa USC-Talamban Campus uban sa tema nga “transforming lives, putting the poor at the forefront”.
Ang Santos nga Misa gipangulohan ni Fr. Eduardo Rocha, SVD, Provincial Superior SVD-Ph Southern Province.
Atol sa wali ni Rocha gipanghimug-atan niini nga ang simbahan para sa mga kabus diin anaa ang panaghiusa ug panag-ambitay uban sa pagpatigbabaw sa pagtinabangay diin sa simbahan ang tanan managsama ug patas.
Human sa Santos nga Misa gisunod dayon ang mga nagkadaiyang presentasyon sa mga beneficiaries gikan sa nagkadaiyang lugar diin dunay proyekto ang JPIC-IDC Inc. sama sa housing, livelihood, scholarship ug uban pa.
Matud ni Maricor Burbos, operation officer sa JPIC, nga karon tuiga espesyal ang gipahigayon nga tinuig nga ambit-saysay sa mga katilingban inubanan sa SVD, JPIC-IDC Inc. ug USC kay nagsaulog man sa ika-20 ka tuig nga pagserbisyo ngadto sa mga kaubas.
Dugang ni Burbos nga gihatagan usab nila og dakung bili karon ang katawhan ug kabataan nga adunay kabilinggan sa kinabuhi nga mahimo silang dawaton ug kabahin sila sa katilingban diha sa komunidad diin sila nagpuyo.
Ang tinuig nga ambit-saysay usa ka adlaw nga kalihukan nga puno sa mga pagtulun-an. (/GMR)(BANATNEWS)