CEBU, Philippines — Ipahigayon sa Traffic Enforcement Agency of Mandaue (TEAM) ang dry run sa bag-ong traffic scheme sa may U.N. Avenue.
Kini aron masulbad ang trapiko sa maong dapit ilabi na ang padulong ug gikan sa Mactan-Cebu International Airport (MCIA).
Matud ni Architect Florentino Nimor Jr., ang executive director sa TEAM, nga sa bag-ong scheme ang mga sakyanan gikan Dakbayan sa Sugbo padulong sa airport deretso ra kini U.N. Avenue.
Ang mga sakyanan gikan sa D.M Cortes moliko patuo padulong sa ilawom sa bridge diin sila mo U-turn aron mousa sa trapik gikan sa Marcelo Fernan Bridge padulong liko sa Cansaga o deretso sa Pacific Mall.
Matud ni Nimor nga mas taas kini nga rota apan mas paspas ang dagan sa trapiko. Ang mga sakyanan nga gikan sa Cansaga ang moliko patuo padulong sa U.N. Avenue aron mousa sa mga sakyanan nga gikan sa Marcelo Fernan Bridge padulong sa Dakbayan sa Sugbo.
Wala nay sakyanan nga makaderetso gikan sa D.M Cortes padulong sa Cansaga ug vice versa aron hawan ang intersection.
Si Nimor nagkanayon nga nadasig sila nga mopatuman sa bag-ong scheme human sa tigum sa Mactan-Cebu Bridge Management Board (MCBMB) diin nahisgutan ang trapiko sa maong dapit.
Si Gobernador Gwendolyn Garcia una nang nagkanayon nga molanat og pila ka minutos ang pagkatanggong sa mga sakyanan sa may U.N. Avenue ilabi na gikan sa airport.
Matud ni Garcia nga nahimong “first impression” sa mga bisita sa Sugbo nga grabe ang trapik tungod kay diha pa lang dapita nagkamang na ang dagan sa mga sakyanan.
Si Konsehal Jimmy Lumapas nga maoy chairman sa committee on transportation sa konseho sa Dakbayan sa Mandaue niingon nga daku ang ilang tinguha ang pagsulbad sa nasinati nga panaghuot sa mga sakyanan sa U.N. Avenue.
Matud ni Lumapas nga mosumiter si Nimor sa traffic board sa resulta sa dry run uban ang rekomendasyon nga maoy basehan sa ilang ipalabang nga ordinansahon.
Si Nimor sa iyang pagpasabot niingon nga sa ilang gihimo nga pasiuna nga pagtuon maoy ilang nasuta ang 2,700 ka pribadong sakyanan ang gikan sa Dakbayan sa Lapu-Lapu nga mosulod sa Dakbayan sa Mandaue.
Samtang sa mao gihapon nilang pagtuon nga gihimo maoy ilang nasuta ang 1,394 ka mga sakyanan gikan sa Dakbayan sa Mandaue nga mosulod sa Dakbayan sa Lapu-Lapu nga maoy ilang gitan-aw karon nga makuha-kuhaan alang sa pagpaluag sa kahimtang sa trapiko sa nahisgutang dalan sa maong dakbayan. (GMR) (BANAT NEWS)