CEBU, Philippines – Ipa-monitor ni Talisay City Mayor Gerald Anthony “Samsam” Gullas Jr. ang mga tinun-an nga adis-adis.
Kini human adunay taho nga usa sa mga tunghaan sa Barangay Tabunok nakasulod ang ginadiling drugas.
Si Barangay Kapitan Benjie Cabigas nibutyag nga ang mga magtutudlo ang nisumbong kanila sa ilang tinun-an nga nalambigit sa ilegal nga drugas.
Si Cabigas nihulagway nga alarming kini tungod kay basin unya og makatakod pa kini sa ubang inosenteng tinun-an.
Iyang giangkon nga nakaalarma sab sila sa tunghaan nga ang usa ka tinun-an bayolente ug armado pa kini og hait nga hinagiban.
Si Gullas nagkanayon nga makigtagbo siya ni Dr. Arden Monisit, ang schools division superintendent, aron hisgutan ang taho.
Sigon pa niya nga unta makahatag og report kaniya si Monisit labot niini aron siya makapaabot og tabang sa iyang buhatan kun gikinahanglan.
Si Police Major Orlando Carag Jr., hepe sa Talisay City Police Station, nibutyag nga makig-estorya sab unya siya sa mga magtutudlo aron dali nga mailhan ang mga tinun-an nga nagpabadlong. (/GMR)(BANAT NEWS)