Ihulip kang Teban gisabutan pa

CEBU, Philippines – Pabilin gihapon nga wala pa ibutyag ang ihulip sa pwesto ni kanhi Talisay City Councilor Julian “Teban” Daan kinsa nitaliwan na ngadto sa laing kalibutan. Si Mayor Gerald Anthony “Samsam” Gullas, Jr. pabilin gihapon nga wala mobutyag sa pangalan sa ihulip kang Daan.

Apan gitug-an ni Gullas nga nakig-estorya na siya sa mga department head, mga sakop sa konseho, mga lider, pamilya ni Daan ug uban pa.

Matud ni Gullas nga daghan ang ilang gipilian nga mohulip sa pwesto ni Daan.

“Ubay-ubay ni sila nga among gipilian pero kinahanglan usa raman gyud mao na nga mahibaw-an ra gyud ni karong semanaha o ba kaha sa sunod nga semana”, padayag ni Gullas.

Giingon nga usa sa mga pangalan nga nitumaw mao ang anak ni Daan nga si Lester.

Si Gullas nipadaayag nga wala ra siya’y problema kang Lester tungod kay nahibawo naman usab kini sa gimbuhaton isip opisyal.

Si Lester giingong mao kini ang kanunay nga nag-uban-uban sa iyang amahan ug inahan nga niserbisyo isip board member sa unang distrito.

Kaniadto si Daan ang nagserbisyo usab isip board member sa unang distrito ug karon ang kapikas niining si Yolanda Daan ang nagserbisyo isip board member sa nahisgutang distrito sa Probinsiya sa Sugbo.

Hinuon si Gullas wala pa gyud kini mosanong kon si Lester ba ang ilang pillion nga mohulip sa pwesto sa amahan niini. (/BDB)(BANAT NEWS)