CEBU, Philippines — Si Cebu City Mayor Edgardo Labella nimando sa opisyales sa siyudad nga mohatag og tabang alang sa pagpahigayon sa Pasigarbo sa Sugbo diha sa Cebu City Sports Center karong umaabot adlaw’ng Domingo.
Kini isip pagpakita og suporta sa siyudad ngadto sa probinsiya. Matud ni Labella nga gipagamit niya nga libre ang CCSC sa probinsiya alang sa nahisgutang kalihukan.
“It is important that the event will be secured considering that the expected number of people from the provinces and of course from our very own city residents who will witness the activity”, matud ni Labella.
Gimandoan ni Labella ang hepe sa Cebu City Police Office Police Colonel Gemma Vinluan nga makigtambayayong sa iyang representante nga si Konsehal David Tumulak alang sa mga pagpangandam sa seguridad sa kalihukan.
Si Tumulak nitakda na og usa ka meeting tali sa mga opisyal sa CCPO, probinsiya ug sa lainlaing hingtungdan nga ahensiya karong Huwebes alang sa pagpangandam sa seguridad ug uban pang tabang nga mahatag sa siyudad.
Matud ni Labella nga gilauman nga daghang tawo ang moanhi sa siyudad ug ang siyudad kinahanglan usab nga magbutang og mga ambulansiya ug uban pang mga emergency vehicles diha sa mga strategic nga lugar.
Gimandoan usab ni Labella ang hepe sa Cebu City Disaster Risk Reduction and Management Office nga si Harold Alcontin sa pagpatuman sa mga lakang sama sa template sa siyudad sa pagdumala sa Sinulog matag buwan sa Enero.
Dugang ni Labella nga ang Cebu City Transportation Office (CCTO) kinahanglan usab nga mag-andam sa mga karsada duol sa lugar. (/BDB)(BANATNEWS)