CEBU, Philippines — Kahingawa ang gihambin sa mga molupyo, negosyante ug mga turista sa Isla sa Olango, Dakbayan sa Lapu-Lapu human sa lima na ka adlaw nga dili maayo ang panahon.
Kini gumikan sa pagnihit na sa suplay sa pagkaon, tambal, krudo ug gasolina sa isla tungod sa pagkatanggong sa mga pasahero ug kargamento gikan sa Isla sa Mactan.
Apan nahuwas-huwasan ang mga tawo kagahapon dihang niabot si Lapu-Lapu City Mayor Junard “Ahong” Chan nga nagdala og mga relief goods luwan sa chopper samtang ang barko sa Coast Guard ang nihakot sa mga natanggong nga pasahero gikan sa Pier 1 sa Dakbayan sa Sugbo paingon sa Santa Rosa wharf sa Olango Island dayun sa Hilton wharf sa Punta Engaño.
Sta. Rosa Barangay Kapitan Francisco “Isko” Gilig Jr. niingon nga ang nga pasahero ug kargamento gikan sa Hilton wharf gihakot og bus paingon sa Pier 1 tungod kay low tide.
“Daku kaayo ni nga tabang namo diri karon,” matud ni Gilig.
Matud ni Gilig nga nagtinabangay sab ang mga boat operators sa paghatag og krudo sa power supplier aron dili mograbe ang rotational brownout sukad niadtong Huwebes base sa pagbuot sa Mactan Electric Company.
Matud sa MECO nga ang Bussbar Corp ug Salcon Power Corporation nagkuwang na sa krudo tungod kay wala kalabang gikan sa Hilton Port.
Sumala pa ni Gilig nga linaw na ang panahon kagahapon apan dili gihapon pabiyahion sa Coast Guard ang mga pump boats aron pagseguro nga dili na masubli ang pagkatikyaob sa usa ka bangka nga nipugos paglarga niadtong Miyerkules.
Daghan sab ang mga turista nga nangadto sa isla niadtong Domingo ang wala na kauli dihang gipugngan na sa CG ang pagbiyahe.
Mga trabahante ug mga estudyante ang napalta sab sukad niadtong Lunes.
Matud ni Ma. Theresa “Teteth” Mata, Santa Rosa parish evaluator, nga lakip ang ilang bag-ong pari nga sila si Fr. Rickrick Mamararlo, ug Fr. Florido Rosales ang wala kalabang samtang ang ilang mga pari nga sila si Fr. Milton Medida ug Fr. Jeff Monray Romarate ang wala sab nakaadto sa ilang balhinan sa San Fernando Parish.
“Makaya ra man gud unta sa amo mga boatman ang paglabang, pero O.A. lang gyud ang coast guard. Kaduol ras Olango, it takes 15 to 20 minuest ang palabang. Mailhan ra man gud na kon di na mada og labang kay ang mga boatman nay mobalibad,” matud ni Mata.
Mga botika ang giingong nahutdan na sab sa mga tambal samtang dunay pipila ka mapahimuslanon ang giingong nibaligya na sa gasolina sa tag P100 ang litro matud ni Mata.
Gideklarar ang upat ka isla sa Dakbayan sa Lapu-Lapu nga ubos sa state of calamity atol sa tigum sa City Disaster Risk Reduction and Management Council nga gipatawag ni Chan.
Hinoon aprobahan pa kini sa konseho aron mapagawas ang pondo ug magamit sa panginahanglan sa mga isla sama sa pagkaon, ug uban pa. Ang gipaubos sa state of calamity mao ang Olango, Caubian, Cauhagan ug Pangan-an.
Giduso usab ang P7 milyones nga budget alang sa quick response fund nga gamiton. (Rowena D. Capistrano/GMR)(BANATNEWS)