CEBU, Philippines – Tulo ka armadong kalalakin-an nga gidudahang mga miyembro sa New People’s Army ang gidakop niadtong Miyerkules sa hapon sa Badian samtang silang nagsakay og pumpboat.
Matud pa nga nakadawat og intelligence report alas 11 sa buntag ang kapolisan sa lungsod sa Badian gikan sa Ayungon, Negros Oriental bahin sa mga armadong lalaki luwan sa motorbanca nga padung sa Sugbo ug gituohang sa Badian sila modunggo.
Tungod sa maong report gialarma dayon ang kapolisan ug mipadala og mga sakop diha sa Lambog Beach sa Badian.
Tuod man, ala- una ang takna sa hapon miabot ang maong motor banca sa Lambog Beach. Matud pa nga human nidunggo, daling nibiya sa baybayon ang pumpboat ug nilawig balik sa dagat.
Ang kapolisan nag-obserbar sa mga lihok sa tulo nga bag-ong nidunggo. Giingong nag-backpacks apan nakit-ang armado gyud sila. Tungod niini dali silang gialirongan sa mga polis ug gisikop.
Giila ang tulo nga mao sila si Danny Harold Tancinco, Ronnie Herebias ug Marlon Basalo.
Sigun kay Regional Director sa PRO-7, Police Brigadier General Debold Sinas ang tulo gidudahang mga miyembro sa NPA ug posibleng may kalambigitan sila sa kamatayon sa upat ka mga polis niadtong Hulyo 24.
Dugang pa ni Heneral Sinas nga duha sa tulo nga gidakop miangkon nga sakop kini sa NPA.
“Miikyas didto kay murag init didto mao ng miagi diri, migamit og private boat,” matud ni Sinas kinsa miingon nga pagkakaron dili pa nila tuohan nga tinuod ang mga pangalang gipangbutyag sa tulo.
Nabawi gikan sa tulo ang kalibre .38, kalibre .45 nga adunay usa ka magazine, kalibre 38 revolver nga adunay lima ka bala, laing revolver nga adunay upat ka bala, rifle grenade, ug granada, kwartang mokabat P17,170, mga subersibong dokumento, tactical maps, relo ug uban pa.
Ang mga suspetsado gitanggong karon sa Moalboal Police Station alang sa dugang imbestigasyon. (/IBM)(BANAT NEWS)