CEBU, Philippines – Sunog niulbo sa managlahi nga lugar sa Dakbayan sa Talisay ug Mandaue kagahapon ug niadtong Miyerkules.
Unang alarma sa sunog nadawat sa kabomberohan sa Dakbayan sa Talisay alas 5:40 sa hapon diha sa Block 5, Lot 11 Camella Homes, Barangay Dumlog.
Ang kayo sa sunog giingong nagsugod sa kwarto sa panimalay ni Felicisimo Dela Torre, diin giisa kini ngadto sa 1st alarm ug ipaubos pa nila sa imbestigasyon ang hinungdan sa maong sunog.
Ang danyos sa maong sunog nikabat ngadto sa P150 mil ug walay natala nga naangol o nakalas sa maong hitabo.
Samtang nikabat ngadto sa P650 mil ang danyos sa sunog nga niulbo diha sa Batiller Street, Barangay Umapad, Dakbayan sa Mandaue kagahapon sa buntag.
Ang sunog nagsugod sa storage sa Sakura Auto parts ug walay natala usab nga naangol o nakalas sa maong sunog.
Matud ni SFO1 Wendell Villanueva, hepe sa communication section sa Mandaue City Fire Station nga gipaubos pa sa imbestigasyon ang hinungdan sa maong sunog,
Lakip sa naugdaw ang mga storage room, stock room, office, bunk house ug uban pa. (Lowena Valmoria/BDB)(BANAT NEWS)