CEBU, Philippines — Kuwang ra gyud ang mga traffic signs ug traffic lights sa kadalanan sa Dakbayan sa Mandaue aron epektibong madumala ang dagan sa trapiko ug malikay sa disgrasya ang mga motorista ug ang mga lumalabang sa dalan sumala pa sa buhatan sa Traffic Enforcement Agency of Mandaue (Team).
Ang TEAM buot mangayo sa buhatan ni Mayor Jonas Cortes og dugang pundo alang sa pagpahimo ug pagbutang sa maong mga traffic signs aron ibutang sa mga dapit nga nagkinahanglan niini gumikan sa kadaghan sa mga sakyanang moagi.
Usa sa gituohang hinungdan sa mga aksidente sa kadalanan diha sa Mandaue City mao ang kakuwang sa mga traffic signs nga giya sa mga motorist.
Sa miaging semana adunay natala nga mga aksidente sa maong siyudad diin nalamba ang nagsakay og motorsiklo diha sa Lopez Jaena St. sa Barangay Subangdaku ug duna sab sa A.C. Cortes Avenue sa Barangay Ibabao.
Si Florentino Nimor Jr., nga maoy pangulo sa maong buhatan miingon nga kinahanglan sab madugangan ang mga traffic lights sa mga dagkong eskina. Sa pagkakaron, 21 lamang ka mga eskina sa siyudad ang naa niini.
Nabalaka si Nimor nga daghang mga pedestrian ang mabanggaan tungod sa kakuwang sa mga cautionary traffic signs sa mga dagkong karsada ilabi na panahon sa kagabhion diin ang mga tawo maglabang-labang sa karsada. (/IBM)(BANATNEWS)