CEBU, Philippines – Nigradwar na ang 75 ka Person Deprive of Liberty (PDL) sa Cebu City Jail sa Surrender to God (SuGod) Recovery and Renewal Program human sa upat ka adlaw nga kalihukan isip ikapito nga batch nga maoy labing daghan.
Matud sa chairman sa Commission on the Laity ug executive director sa SuGod Program sa Love of Community ug Archdiocese of Cebu, Fe Mantuhac-Barino, nga mapasalamaton siya sa kadagkuan sa Bureau of Jail Management and Penology sa maong programa.
Dul-an sa 500 ang ni-avail sa maong programa ug nakagawas apan upat ang nabalik sa prisohan ug gisubay pa ang hinungdan.
Mapasalamaton si Barino sa nagpadayon sa pagpakigbisog sa mga pagsulay nga ilang nasugatan.
Gihagit ni Barino ang mga ning-gradwar sa SuGod Program nga padayon silang motahan sa ilang kinabuhi ngadto sa Ginoo tungod kay kini ang moalim sa mga nasamdan ug motabang sa mga nagkalisud-lisud. Gitug-an ni Barino nga kung wala ang Ginoo sa ilang kinabuhi segurado gyud nga palpak ang ilang pagpadagan niini hinungdan nga dili gyud angay moundang sa pag-ampo ug pagpangandoy sa gugma ug kalinaw.
Mapasalamaton si Barino sa pipila ka sakop sa banay nga nitambong sa kalihukan kay daku kaayo kini sila og tabang alang sa kabag-ohan sa sakop sa ilang banay nga anaa sulod sa detention facility.
Usa ka inahan nga nitambong sa maong kalihukan nitug-an sa Banat News nga malipayon siya sa pag-gradwar sa iyang kamanghurang anak ug malaumon siya nga magpadayon na ang kabag-ohan niini ug dili na kini magpakabuang sa bisyo.
Ang inahan nitug-an nga magpadayon gihapon siyang mangaliya alang sa iyang anak ug sa tanang PDL sa prisohan. (/GMR)(BANAT NEWS)