CEBU, Philippines – Padayon ang pagpangaylap og dugang impormasyon ang kapulisan sa Dakbayan sa Mandaue may kalabutan sa pagpatay sa usa ka nakasohan tungod sa paghupot og armas human kini nitambong sa hearing sa maong kaso diha sa Mantawi Road, Barangay Tipolo.
Ang gipatay Teodoro Mejares, 53, kinsa gipusil patay sa riding in tandem samtang kini kuyog sa iyang asawa ug apo nagpaabot og masakyan pauli 50 metros gikan sa ganghaan sa Mandaue City Hall of Justice sa lugar.
Gitug-an ni Police Col. Julian Entoma, ang City Director sa Mandaue City Police Office nga nahinabi sa Banat News nga ilang gitan-aw ang impormasyon nga dunay laing kaso didto sa Leyte si Mejares apan wala pa nila nasayran kun unsa kini.
Matud pa ni Entoma, sa pagka karon blangko pa sila sa motibo sa pagpatay sa biktima apan kuhaon pa nila ang profile niini tungod kay lumad kini nga taga Leyte.
Dako ang ilang pagtuo nga taga Leyte ra usab ang kontra niini ug planado ang pagpatay kaniya tungod kay nasayod man ang gun man sa schedule sa hearing sa iyang kaso.
Dugang pa ni Entoma, base sa ilang inisyal nga kasayuran nibalhin kini og puyo sa Consolacion tungod kay may kaso kini didto sa Leyte.
Kung mahinumduman atol sa pakighinabi sa Banat News sa asawa sa namatay kini nitug-an nga wala siya makadawat ug hulga ang iyang bana, apan sa dihang gipatay kini sa wala mailhing mamumuno nga nagmotor nihangyo pa kini nga dili kini patyon, apan gitiwasan na hinoon kini tumong sa ulo. (/IBM)(BANAT NEWS)