CEBU, Philippines — Ang National Bureau of Investigation-7 (NBI) ug kapolisan wala pay “person of interest” (POI) sa paglubag sa liog sa 9-anyos nga lalaki kinsang unang gikataho nga naghikog sa Lungsod sa Badian.
Kagahapong adlawa gihatod na sa katapusang pahulayan ang biktima nga si Def Leppard Siclahon sa Badian Catholic Cemetery.
Matud ni NBI-7 director Atty. Tomas Enrile nga wala pa silay matumbok nga POI sa pagpatay sa bata.
Matud niini nga daku ang posibilidad nga kapamilya ra sa bata ang mihimo sa krimen sanglit sa balay ra kini napalgan nga patay. Nasayran nga naabtan sa apohan nga si Jesus Siclajon ang bata nga patay na human mabugkos ang liog niini sa duyan.
Sa autopsy report ni Dr. Rene Cam ang medico legal sa NBI-7, adunay foul play ang pagkamatay niini human masuta nga na dislocate ang bukog sa liog niini diin nagpasabot nga adunay kusog nga pwersa nga milubag sa liog niini nga maoy hinungdan sa iyang hinanaling kamatayon. Tungod niini, ang NBI nga molusad og mas lawom pa nga imbestigasyon sa kaso uban ang polis.
Hinuon ang deputy chief sa Badian Police Station nga si Police Executive Master Sergeant Ronald Elcana nagkanayon nga aduna na silay gipangimbitar nga pamilya sa biktima ug mga silingan aron moluwat og pamahayag kabahin sa hitabo.
Bisan paman niini, wala pa silay matumbok nga POI sa krimen hinungdan nga padayon ang ilang pagpanguha og ebidensya sa kaso.
Sa laing bahin, ang tigpamaba sa Cebu Provincial Police Office ug hepe sab sa Investigation Detection and Management Branch nga si Police Lieutenant Colonel Eloveo Marquez nagkanayon nga wala pa nila giimbestigahan ang Badian Police sanglit wala silay nadawat nga pormal nga reklamo batok niini. Nasayran nga unang gipadayag sa Badian Police nga walay foul play ang nahitabo ug wala usab nila gipa-autopsy ang patayng lawas bisan og mao kini ang protocol na sa mga imbestigador. (/DILT)(BANATNEWS)