CEBU, Philippines — Nikabat ngadto sa 80 ka balay ang hingpit nga naugdaw sa nahitabong sunog nga niulbo diha sa Sitio Ibabao, Barangay Pusok, Dakbayan sa Lapu-Lapu kagahapon sa buntag.
Gikataho nga kasagaran sa mga balay nga naugdaw ginama sa mga light material ug gibana-banang nikabat ngadto sa P450 mil ang danyos sa maong sunog. Nadawat sa kabomberohan ang alarma sa sunog alas 5:41 sa buntag, giisa sa second alarm alas 5:45, third alarm alas 6:10 ug nakontrolar ang kayo sa sunog alas 6:20 ug na-fire out alas 11:01 na sa buntag.
Ang sunog giingong nagsugod sa balay ni Gina Rosales diin giimbestigar pa karon ang hinungdan sa pag-ulbo sa kayo.
Si fire investigator Fire Officer 2 Christian Clyde Tacandong nagkanayon nga walay natala nga naangol o nakalas sa maong sunog.
Si Mayor Paz Radaza sa maong dakbayan nimando na karon ni Barangay Captain Justino Booc Jr, sa temporaryong pagpahimutang sa mga nasunogan diha sa Pusok Mini Hoops Dome.
Ang mga tinugyanan sa City Social Welfare and Services (CSWS) padayon usab karong nihimo og pakisusi sa mga nasunogan alang sa ayuda nga ilang ihatag. (BDB) (BANAT NEWS)