CEBU, Philippines — Nanamilit na si outgoing Mayor Tomas Osmeña sa mga kawani sa Cebu City Hall human sa flag raising ceremony kagahapon sa Plaza Sugbo.
Hangtud nalang sa Hunyo 30 si Osmeña sanglit hulipan na kini ni Bise-Mayor ug Mayor-elect Edgardo Labella.
Nigahin og oras ang mayor nga makapanamilit ug makapasalamat sa mga empleyado sa City Hall ug sa mga nitabang sa iyang administrasyon.
Usa sa ikapanghambog ni Osmeña sa dili pa kini mobiya sa katungdanan ang kalampusan nga naangkon sa Office of the City Civil Registrar nga nipasar sa ISO 9001:2015, usa ka worldwide standard alang sa quality management.
Daku ang kalipay ni Osmeña nga dunay department sa City Hall ang nakakuha sa maong rating.
Lakip sa gihisgutan ni Osmeña ang mahitungod sa pagbaligya sa South Road Properties (SRP).
Pinaagi sa mga kaalyado niini sa konseho sa siyudad, tinguha nila ang re-bidding sa property.
Sa pagtapos sa mayor sa iyang mensahe, duna kini gibilin ngadto sa mga empleyado ingon man sa molupyo sa siyudad sa Sugbo.
“Magpabilin akong damgo, atong mga kabataan naa sila’y kompletong edukasyon, naa sila’y kwarta para sa ilang kaugmaon. So with this, I said goodbye to all of you and I hope that the Sto. Niño will continue to protect us, we will survive, you will survive, and God willing Cebu will survive,” matud ni Osmeña. (BANAT NEWS)