CEBU, Philippines – Bisan og nakasinati na karon og uwan ang Sugbo apan matud ni Engineer Al Quiblat sa Philippine Atmospheric Geophysical Astronomical Administration (PAGASA) wala pa kita sa rainy season.
Si Quiblat nagkanayon nga dili pa masinati karon ang La Niña bisan og aduna nay mga pag-ulan tungod kay gipaabot nga hangtud pa sa buwan sa Agosto molanat ang El Niño.
Gipasabot ni Quiblat nga ang ulan karon nga nasinati transition pa lang gikan sa ting init ngadto na sa ting-ulan apan dili pa kini matawag nga rainy season.
Ang ulan nga nasinati karon nakatabang kini sa kakulang sa tubig tungod kay gikan Mayo 1 ngadto sa 22, 2019 adunay natala ang PAGASA nga 13.1mm nga gidaghanon sa ulan.
Samtang ang tigpamaba sa Metropolitan Cebu Water District Charmaine Rodriguez-Kara nitug-an nga nakatabang ang ulan nga nasinati karon sa kakulang sa supply sa tubig tungod kay adunay minimal nga increase ang Jaclupan dam.
Gitug-an ni Kara nga bisan sa nasinati nga ulan wala pa gihapon kini nakapasaka sa Buhisan dam.
Gilauman nga makasinati pa og dugang nga mga pag-ulan sa umaabot nga adlaw diin makatabang kini sa pagsaka sa mga supply sa tubig sa dam. (/BDB)(BANAT NEWS)