CEBU, Philippines — Makadawat na sa ilang honorarium ang mga magtutudlo sa Siyudad sa Talisay nga niserbisyo sa piniliay sunod semana. Kini maoy gipahibawo ni Atty. Charise Faith Sojor, election officer sa Dakbayan sa Talisay.
Matud niya nga ilang padad-an og suwat ang Department of Education aron pormal sila nga makahibawo kun kanus-a kini nila makuha ang ilang suhol. Si Sojor nitataw nga ila lang iskedyul ang oras kun kanus-a moadto sa ilang buhatan ang mga magtutudlo aron dili sab sila magdasok.
Moabot sa 884 ka tawo ang nitabang isip mga sakop sa Board of Election Inspectors (BEI) ug uban pa.
Ang labing taas nga posisyon makadawat og P6 mil samtang magkaubos na ang madawat depende sa posisyon nga gihuptan. Nagpasalamat si Sojor nga wala ray mga dagku nga kakulian nga ilang giatubang atol sa piniliay. GMR (BANATNEWS)