CEBU, Philippines – Ang Cebu City Prosecutor’s Office mi-dismiss sa kaso sa duha ka opisyales sa Sangguniang Kabataan sa Barangay Cogon Ramos sa Dakbayan sa Sugbo ug laing duha ka youth volunteers nga gipasanginlang nag vote buying ug vote selling.
Sila si SK Councilor Kyle Dublin Baricuatro, SK Secretary John Paul Mahinay, Theodoric Pepito ug Anjo Pepito gipasakaan og kaso gumikan sa kalapasan sa Section 261 (vote buying ug vote selling) sa Omnibus Election Code.
Si Prosecutor IV Maria Theresa Calibugan-Casiño sa iyang joint resolution mi-dismiss sa reklamo gumikan sa kakuwang sa probable cause.
“After a careful scrutiny of the evidence at hand as well as taking into consideration the answers made by parties to questions propounded during Inquest Proceedings, undersigned finds insufficient evidence to indict respondents with the offense as charged,” tipik sa joint resolution nga gi-aprubahan ni City Prosecutor Liceria Lofranco-Rabillas.
Niadtong Mayo 11, 2019 ang mga sakop sa Abellana Police Station nakadawat og kamanduan nga moadto sa Cogon Ramos gym gumikan matud pa sa presensiya sa armadong tawo.
Sa ilang pag-abot wala’y armadong tawo nga nakita, apan dihang mobiya na unta sila dapit nabantayan nila ang grupo sa mga tawo nga nagtapok ug giingong dunay mga sobre nga gipanghatag.
Ang kapulisan giingong dunay nadunggan nga matud pa si Mahinay miingon “Jerry Guardo ta ha. Vote straight BOPK.”
Matud pa nga si Mahinay nakit-an nga nangapud-apod og sobre kang Baricuatro, Theodoric ug Anjo nga maoy rason nga sila gisikop kay giingong nag-vote buying ug vote selling.
Si Mahinay sa inquest proceeding miingon kang Casiño nga sa maong petsa wala’y vote buying ug selling nga nahitabo.
Ang SK mipahigayon og Basketball ug Volleyball Summer League gikan sa May 9 hangtod sa 11, 2019.
Gipasabot niini, sa katapusang adlaw mao ang championship games, awarding ug paghatag sa premyo, uniform subsidy ug gipahigayon ang closing ceremonies.
Matud ni Baricuatro, tungod kay kabahin man siya sa organizing committee ug player sab sa men’s volleyball mihimo kini sa iyang tahas nga mao ang pag-receive ug pagpirma og payrolls ug pagsiguro sa distribusyon sa premyo ug subsidy sa mga uniporme sa liga.
Matud niini, samtang siya nagpirma miabot ang mga armadong tawo.
Midugang si Baricuatro giingong nakit-an niini ang mga tawo nga mibutang og kwarta sulod sa puti nga envelope ingon man flyers ni Guardo.
Gihimakak sab ni Anjo ang alegasyon batok kaniya. Matud niya didto siya sa gym aron pagtambong sa liga samtang si Theodoric sa iyang bahin naa didto kuyog ang iyang father-in-law. Nipagawas og desisyon si Casiño pabor sa mga respondents.
“Being known election violations, perpetrators would commonly hide on the cloak of darkness, use stealth or surreptitiously approach voters to seduce to vote for or against a candidate. This did not hold true in the herein case,” subay na sa joint resolution.
Kay ang lugar sa nahitabon usa ka public place, well-lighted ug dunay mga sibilyan si Casiño miingon impossible ang alegasyon, sanglit sayod man nga ang vote buying ug selling usa ka election violations.
“The fact that alleged recipients of vote buying were made to sign a payroll as proof of the election violation casts questions of credibility of the incident”, ni Casiño pa. (/IBM)(BANAT NEWS)