CEBU, Philippines – Ang pagbalik ni 6th district Congressman Jonas Cortes ug Board Member Glenn Bercede isip mayor ug bise mayor sa Dakbayan sa Mandaue gilauman usab sa mga manindahay nga hingpit na usab nga mabuksan ang gitukod nga merkado publiko nga nahimutang diha sa Barangay Centro.
Gitukod ang maong bag-ong edepisyo sa merkado publiko sa naghinapos na nga termino nila ni Cortes ug Bercede isip mayor ug bise mayor sa siyudad nga hingpit usab nga nahuman ang kaugmaran sa paglabay sa pipila ka mga bulan sa pag-asumer sa katungdanan ni Quisumbing ug Carlo Fortuna sa eleksiyon niadtong 2016.
Sa niaging tuig pa nga nahuman ang kaugmaran sa maong edepisyo ug gani gikataho nga buksan ang maong merkado publiko atol sa pagsaulog sa charter day sa siyudad niadtong Agosto 30, 2018.
Sa wala masayri nga kakulian wala mahinayon ang pagbukas sa merkado publiko hangtud nga naabtan na kini sa election sa May 13, 2019.
Sa laing bahin, niadtong Martes sa kadlawon opisyal nga giproklamar sa Mandaue City Comelec si Cortes isip napiling mayor sa siyudad diin nakakuha kini og 101,641 botos batok kang Quisumbing nga nakakuha lang og 58,842 botos.
Samtang si Bercede ang nakakuha usab og 89,646 botos batok ni incumbent vice mayor Carlo Fortuna nga nakakuha og 67,586 botos.
Nidaog usab ang tanang kandidato sa pagkakonsehal ubos sa Team Mandaue nga naglakip nila ni Nerrisa Soon- Ruiz, Malcolm Sanchez, Jimmy Lumapas, Cynthia Remedio, Malyne Cortes-Zafra, Cesar Cabahug, Carmelino Del Mar, Jun Arcilla, Atty. Joel Seno ug Andiong Ouano Icalina. (/BDB)(BANAT NEWS)