CEBU, Philippines – Usa ka sakop sa budol-budol o mangingilad ang nasikop didto sa Barangay Tabunok sa siyudad sa Talisay kagahapon sa hapon.
Ang nasikop nailhan nga si Mylene Villomo, 47 anyos nga taga Barangay Pooc sa maong siyudad. Gawas sa mga reklamo sa pagpangilad, nakuhaan usab kini og ginadiling drugas.
Una niini, si Liwanag Dela Cruz, 73 anyos nga taga Barangay Cansojong ang gistoryahan sa suspek nga tabangan ang usa ka foundation sa iyang bana nga foreigner.
Aron nga mutuo ang bana sa suspek nga tabangunon ang biktima gipahubo niini ang mga alahas ingon man pagbilin sa kwarta niini ngadto kaniya.
Matud pa ni PO3 Glenn Besande sa Talisay City Police Station nga adunay papel nga pa photocopyhan ang suspek sa biktima og diha na kini musibat bitbit ang mga butang sa biktima.
Apan walay suwerte tungod kay nakabantay ang biktima nga giilad siya hinungdan nga nagpakitabang kini sa mga tawo sa lugar hangtud nga nakorner ang suspek.
Wala man tuod nabalik ang salapi sa biktima apan nakuhaan og duha ka pakite sa ilegal nga drugas ang suspek nga mitimbang og 9.68 gramos nga mubalor P68,000.
Kagahapon sa buntag, usa ka Corazon Ybas, 74 anyos nga taga Barangay Pooc sa maong dakbayan ang niila sa suspek nga mao sab ang niilad kaniya niadtong Septiyembre 3 sa miaging tuig. Naghilak ang edaran sa dihang nakita pagbalik ang nangilad kaniya.
Laing nabiktima sa suspek mao sila si Elizabeth Silayan, 66 anyos ug apo niini nga si Justine Silayan, 12 anyos nga pulos taga Barangay Bulacao-Pardo.
Ang mga biktima nibutyag nga mao ra nga mudos ang ilang nadangatan tanan nga nabiktima sa suspek. —/LPM (BANAT NEWS)