CEBU, Philippines — Nagtingkagol karon sa lock-up jail ang 18-anyos nga mabdos kinsa nakuhaan og ginadiling drugas atol sa gipahigayon nga buybust operation sa mga tinugyanan sa Carbon Police Station kagahapon sa kadlawon sa may Sitio Bato, Brgy. Ermita, Dakbayan sa Sugbo.
Nangulo sa maong operasyon mao si Police Major Randy Caballes, hepe sa Carbon Police Station diin ilang nadakpan ang manganakay nga si Marfflyn Batoto, siyam ka bulan nga madbos.
Nasayran nga nakadawat og taho ang kapolisan nga si Batoto maoy mipuli sa iyang kapuyo sa pagpayuhot og ginadiling drugas. Ang iyang kapuyo naprispo na usab karon.
Nasakmit gikan sa dinakpan ang pinutos sa ginadili nga drugas nga motimbang og 100 gramos nga mobalor og dul-an sa P700 mil basi sa Dangerous Drug Board Value, lakip na ang halin sa pagpamaligya niini.
Giandam na karon sa kapolisan ang pagpasaka og tukma nga kaso batok sa dinakpan. (/DILT)(BANATNEWS)