CEBU, Philippines — Sugdan sa kampo ni Bise Gobernador Agnes Magpale ug Gobernador Hilario Davide, III ang ilang pangampaniya sa umaabot nga eleksyon pinaagi sa upat ka adlaw nga caravan.
Magsugod kini sa Dakbayan sa Danao paingon ngadto sa ubang mga lungsod sa norte karong umaabot Marso 29 ang adlaw sa pagsugod sa campaign period alang sa midterm election karong Mayo 13.
Si Magpale kinsa nilansar pagkagobernador nagkanayon nga sa unang mga adlaw sa ilang campaign sortie unahon usa nila ang mga lungsod sa norte ug libot didto sa north-west dayon sa mid-west padayon ngadto sa habagatan nga lungsod sa lalawigan sa Sugbo.
Wala’y labot pa niini ang mga lungsod ug dakbayan nga problemado ang trapiko sama sa Mandaue ug Lapu-Lapu.
Dili pa usab maapil sa upat ka adlaw nga caravan ang mga isla sa Bantayan ug Camotes.
Human sa caravan planohon pagbalik sa ilang kampo ang ilang pagsuroy sa mga lungsod ug dakbayan nga "critical" tungod kay traffic.
Si Magpale nitug-an nga aduna sila’y gilihok karon nga pagpakuyog og usa ka artista nga adunay gidala nga party list atol sa ilang pangampaniya.
Wala pa gibutyag ni Magpale ang pangalan sa maong artista sanglit padayon pa ang ilang negosasyon niini.
Nitug-an usab si Magpale nga pipila na ka mga senador ang niduol sa BAKUD alang sa suporta apil na niini si Ronald “Bato” dela Rosa nga didto na sa Dakbayan sa Danao ug gikatakda usab si Bong Go nga moduol sa BAKUD.
Gawas sa mga senador sa Nationalist People's Coalition posibleng ilang i-adopt ug suportahan ang pipila ka senatorial candidates nga giendorso ni Sara Duterte. (/BDB)(BANATNEWS)