Annabeth Cuizon: Dili makatuman sa rekisitos, dili hatagan og bugas

CEBU, Philippines — Gipahigayon kagahapon sa atubangan sa Cebu City hall ang ikaduhang hugna sa pagpang-apod-apod og bugas alang sa mga motorcycle-for-hire dinhi sa siyudad.

Nikabat ngadto sa 1,700 ka sakong bugas ang na-distribute ngadto sa mga habal-habal ug Angkas driver. Ang Dakbayan sa Sugbo adunay 6,000 ka habal-habal ug Angkas driver.

Kahinumduman nga ang city hall nitabang sa mga motorcycle-for-hire sa Dakbayan sa Sugbo human gisuspenso sa Korte Suprema ang operasyon sa Angkas lukop nasud.

Ang unang hugna sa rice distribution nahitabo niadtong Pebrero 23 diha sa Plaza Independencia diin  niabot ngadto sa 1,200 ka sakong bugas ang naapod-apod.

Si city assistant administrator Annabeth Cuizon nagkanayon nga dili sila mo-release og bugas ngadto sa wala naka-comply sa mga rekisitos nga gipangayo kini base sa Executive Order no. 45 nga giluwatan ni Mayor Tomas Osmeña.

Gibutyag ni Cuizon nga aduna pay laing hugna sa rice distribution depende sa gidaghanon sa mga maka-comply sa rekisitos.

Ang mga nakatuman sa rekisitos sulod sa 15 ka adlaw kinahanglang makuha na nila ang bugas aron kini mahabwa gikan sa bodega. (BANAT NEWS)