CEBU, Philippines — Patay ang usa ka menor de edad human gipusil sa wa ilhing mamumuno diha sa Sitio Mananga 1, Barangay Tabunok, Siyudad sa Talisay niadtong Domingo sa gabii.
Ang biktima nailhan lang sa pangan nga Jay-Ar, 16 anyos , nagpuyo sa maong dapit. Si Chief Insp. Ardeolito Cabagnot, deputy chief sa Talisay City Police Station niingon nga nakit-an ang biktima nga nagbuy-od ug naglunang sa kaugalingong dugo.
Tulo ka basiyo sa kalibre .45 nga bala ang nakuha sa crime scene. Wala makuha sa kapolisan ang kompletong pangalan niini tungod kay ang mga ginikanan nangapriso tungod sa ilegal nga drugas.
Nagduda ang kapolisan nga posibleng nalambigit sab sa ilegal nga drugas ang kamatayon sa biktima kay dunay report nga wala kini ka-remit.
Kagahapong adlawa, ang Children’s Legal Bureau Inc. (CLB) niduyog sa lihok protesta pagsupak nga paubsan ang edad sa batan-on aron sila manubag sa balaod kun makahimo og krimen.
Si Atty. Joan Dymphna Saniel-Amit, Executive Director sa CLB nagkanayon gitunong nila ang rally dungan sa sesyon sa Senado kagahapon diin gituki ang maong isyu. Si Dyan Gumanao, coordinator sa National Union of Students of the Philippines Cebu (NUSP) nagkanayon nga ang mga batang nakasala sa balaod angay tabangan inay prisohon ilabi na kadtong gikan sa mga kabus nga pamilya nga sagad mabiktima sa sirkumstansiya gumikan sa kalisod. Joevelon G. Pinay (BANAT NEWS)