CEBU, Philippines — Tulo patay atol sa pinusilay kagahapon sa dalan J. Alcantara, sa Barangay Sambag Uno ning Dakbayan sa Sugbo.
Ang mga nakalas giila nga silang: Vanzant Navales, residente sa St. Jude Acres, Bulacao-Pardo ning dakbayan ug ang manag-amahang Edwin Bacaltos, 57, ug si Shaun Edwin Bacaltos, 23, nagpuyo sa maong dapit.
Sigun pa sa hepe sa Abellana Police Station nga si Chief Inspector Edward Sanchez nga base sa ilang nakalap, alas sais sa buntag gisulong ni Navales uban sa iyang manghud nga si Vincent Navales ug laing tulo ka mga higala ang panimalay sa mga Bacaltos.
Matud pa nga armado si Vanzant nga misulong sa mga Bacaltos.
Samtang ang padre de pamilya sab nga si Edwin mikuha sa iyang kalibre .9mm dihang nagka-komprontasi na sila sa grupo ni Vanzant.
Tungatunga sa ilang away nagkabutobuto ug giingong nahagba si Vanzant human giingong gipusil ni Edwin sa nagkadaiyang parte sa lawas niini.
Sumala pa ni Sanchez, dunay report nga ang usa sa mga anak ni Edwin nga si Michael Vincent Bacaltos, 26, nipunit sa armas ni Vanzant ug gigamit kini pagtiwas sa naulahi.
Dugang pa ni Sanchez, ang manghod ni Vanzant nga si Vincent pagkakita sa nahitabo sa igsuon nanimalos ug gipusil ang manag-amahang sila Edwin ug si Shaun.
“Mo-uwang ra unta to si Shaun pero naigo man hinuon siya,” sigun ni Sanchez. Nadala pa sa tambalanan ang manag-amahan apan gideklarar nga dead on arrival si Shaun samtang si Edwin nabugtoan sa iyang kinabuhi paglabay sa pipila ka oras .
Samtang dead on the spot si Vanzant ug naabtan pa kining nagbuy-od sa kalsada. Dali nga nisibat silang Vincent ug ang laing tulo ka mga higala dala ang KG-9 ug sakay sa puwa nga sakyanang Hyundai nga may plakang MP4500.
Nakuha gikan sa nahitaboan ang pipila ka mga basiyo sa kalibre .9mm nga armas. Samtang ang usa sa mga residente sa maong dapit, kinsa mihangyo nga pugngan iyang ngalan, mitug-an nga paspas kaayo ang panghitabo.
“Sunod-sunod ang mga boto paspas kaayo,” sigun niini.
Aduna untay CCTV sa tapad nga veterinary clinic duol sa crime scene apan matud pa sa deputy chief sa Abellana Police Station nga si Senior Inspector Gomersendo Mandawe, dili kini maklaro.
Love triangle ang usa sa mga anggulo nga gisubay sa maong krimen human nasuta nga naguba ang kapin lima ka tuig nga panaghigalaay nilang Shaun ug ni Vanzant gumikan sa panagribal nila sa usa ka babaye.
“Suod kaayo na sila sa una kay pareha man kuno na sila og hilig kanang car racing,” si Sanchez nagkanayon.
Matud ni Sanchez naangin na ang ilang mga pamilya ug gipatawag na sila kaniadto sa barangay apan wala motungha ang duha ka mga habig.
Buot na sab hiloton sa pamilyang Bacaltos ang maong away ug giingong miadto sila sa panimalay sa mga Navales inubanan og polis apan napakyas kini.
“Unfair kaayo sa part sa mga Bacaltos kay sila niadto nagdala og polis pero ang Navales wala gyud nagdala nidiretso ra og adto sa ilaha,” si Sanchez nagkanayon.
Pasakaan og kasong murder ang grupo ni Vincent samtang gidakop na karon sa kapolisan si Michael Vincent kinsa miangkon nga siya maoy nakapusil kang Vanzant. (BANAT NEWS)