CEBU, Philippines — Nikabat ngadto sa 180 ka sakyanan nga nag-illegal parking diha sa downtown area sa Dakbayan sa Sugbo niadtong Domingo ang na-clamp sa Cebu City Transportation Office (CCTO).
Matud sa operations chief sa CCTO Francisco Ouano nga ang maong mga sakyanan nasakpan nga nag-illegal parking diha habig sa M.J Cuenco Avenue ug Compania Maritima ug ubang dalan sa siyudad.
Ang maong mga sakyanan giingong diha ni-parking sa sidewalk diin dili kini pwede ug daghang reklamo ang nadawat sa CCTO tungod kay maglisud og agi ang mga tawo.
Sa downtown area ilabi na diha habig sa Basilica Minore del Santo Niño ang designated parking area mao ang open space sa Compania Maritima ug dalan Legaspi.
Sukad niadtong Enero 10, ang dalan duol sa simbahan gisirad-an aron paghatag og dalan sa mga deboto nga motambong sa novena mass.
Gumikan sa mga kalihukan sa Sinulog ang downtown area ang labing busy nga dalan matag buwan sa Enero gumikan sa pagdagsa sa mga deboto.
Ang mga drayber kinahanglan nga mosubay sa traffic rules aron ang mga sakyanan dili ma-clamp ug dili sila makabayad og multa nga P1,500.
Niadtong adlaw’ng Domingo kasagaran sa mga nakalapas dili residente sa Dakbayan sa Sugbo.
Nasayran nga 40 ka traffic enforcers ang gipakatap diha sa tanang intersections duol sa simbahan aron mobantay sa dagan sa trapiko ug modakop niadtong mga badlongon nga mga drayber. (BANAT NEWS)