CEBU, Philippines — Moabot sa 20 mil ka mga volunteers, law enforcers, dancers ug uban pang trabahante sa Sinulog 2019 ang insured ubos sa Malayan Insurance Co. Inc.
Kini maoy gipahibawo ni Konsehal Dave Tumulak, ang Sinulog executive committee chairman dihang nahinabi sa mga tigbalita kagahapon.
Asoy niya nga ang tanang mitabang sa Sinulog 2019 sama sa tinugyanan sa balaud, medical staffs, dancers, trabahante sa gobyerno ug uban pa, apil sa insurance nga nagsugod kagahapong adlawa Enero 11 hangtod sa Enero 21.
Gipasabot ni Tumulak nga ang tumong niini mao nga kon pananglitan adunay mahitabo nga dili maayo, adunay kadaganan ug matabangan dayon.
“Naglakip ni siya sa medical reimbursement. Apil niini ang mga tambal, simbako lang, apil sad niini ang accidental death and dismemberment. Apil sad niini ang murder ug ang unprovoked assault if in case”, asoy ni Tumulak.
Niadtong Sinulog 2018 ang mga mitabang aduna say insurance ug gihimo nila kini og balik karong tuiga. Ang pundo sa insurance gikuha sa panudlanan sa Sinulog Foundation Inc.
Ug kay dili man malikayan nga adunay mga politiko nga moapil sa kalihukan sa Sinulog, si Cebu City Mayor Tomas Osmeña mihangyo nga dili lang kini sagulan og politika.
Gani, una nang nabalita nga adunay upat ka mga senatoriables ang mipadala og request sa kagamhanan sa Siyudad sa Sugbo nga ganahan moapil sa Sinulog.
“No one will be allowed to speak except the President because he is the President. I’m giving instructions nga all of this kanang mga karatola, basta any senator tries to project something we will remove”, panganti ni Osmeña. DILT (BANATNEWS)