CEBU, Philippines — Bisan niining modernong panahon nga daghan na kaayong mga kausaban sa panginabuhi ug kahimtang sa katawhan apan sa gihapon wala pa mapapas sa mga pagtuo sa katawhang Pilipinhon ang mga pagpalihi sa pagsugat sa Bag-ong Tuig nga naandan sukad pa sa mga katigulangan pabiling buhi.
Nagkadaiyang pamaagi sa mga pagpalihi nga naglakip na ang pagtigom og nagkadaiyang lingin nga mga prutas sa pagtuong tungod kay lingin walay putol ang grasyang maabot sa ilang kinabuhi sa bag-ong tuig.
Laing palihi nga gisagop sa katawhan mao ang pagsaba sa pagsugat sa tungang gabii sa Bag-ong Tuig ug usa na niini ang pagpabuto kay matud pa abugon niini ang mga dautang espirito ug malas.
Paablihan usab ang mga bintana sa mga panimalay sa pagtuo nga pinaagi niini mosulod usab ang mga panalangin ug grasya nga ibubo sa Labaw’ng Makagagahom dinhi sa kalibutan anang taknaa.
Ang pagtigom og 12 ka mga sinsiyo nga kuwarta nga nagrepresentar sa 12 ka mga bulan sulod sa usa ka tuig nga patingogon ini og bagting sa tungang gabii sa Bag-ong Tuig.
Dunganan usab kini og panalangin ug pagpanawag sa daghang grasya.
Apan gawas sa palihi nga angay buhaton, duna say mga gidili ipabuhat kay malas. Usa niini ang dili paggasto og kwarta nianang tungang gabii pagsugat sa Bag-ong Tuig kay nagtuo silang mahimong usik sa kwarta ang pamilya anang tuiga.
Aduna say mga pagkaong dili angay iandam sama sa manok kay molupad ang grasya palayo, dili sab angay mogamit og ice kay mahilis ang grasya ug uban pa.
Way dautan ang pagtuo-tuo sa palihi sumala pa sa katiguwangan basta dili kalimtan ang panalangin alang sa kaayohan sa tanan.- IBM (BANATNEWS)