MANILA, Philippines — Mokabat P10.8milyones nga balor sa illegal nga drugas ang nasakmit sa mga tinugyanan sa Pardo Police Station sa Cebu City Police Office diha sa Sitio Camansi, Barangay Mambaling niadtong Sabado sa hapon.
Ang grupo ni Police Chief Inspector Regino Maramag Jr. maoy nakadakop kang Jeanrea Tabalin, 21anyos, residente sa maong lugar. Nasakmit gikan kang Tabalin ang mga pinutos sa ginadili nga drugas nga motimbang ug 1.6 kilos.
Ang pangalan ni Tabalin, nilugwa gikan sa mga dinakpan nilang Maramag niadtong unang semana ning bulana nga niresulta sa pagkasakmit sa P36.3 milyones nga shabu. Matud pang Maramag, si Tabalin maoy hagbongan sa drugas.
Sumala pang Maramag, si Tabalin usa ka bigtime drug pusher kay tig-supply ug tigbaligya kini og kinilo nga shabu.
Gisubay karon nila Maramag kung aduna bay kalabotan ang amahan ug igsuon ni Tabalin nga parehong nabilanggo karon sa Cebu City Jail human sila nadakpan tungod gihapon sa ilegal nga drugas.
Kaniadto pa gidungog sa kapolisan nga ang mga dinagkong mga transaksyon sa ilegal nga drugas anha mag-agi sa mga inmates nga natanggong sa Cebu City Jail. (/IBM)(BANATNEWS)