CEBU, Philippines – Tulo nalang ka adlaw sa dili pa ang Misa de Gallo ug si Cebu Archbishop Jose Palma mipadayag sa mga preparasyon alang sa umaabot nga kasaulogan.
Matud sa arsobispo nga ang Misa de Gallo pagpangandam kini alang sa Pasko diin malaumon siya ug maampoon nga mapahiladman pa sa katawhan ang mensahe sa maong selebrasyon.
Sumala ni Palma, angay buksan sa katawhan ang ilang kasingkasing aron sa pagdawat ni Kristo, dili sama sa nahitabo ni Kristo nga walay midawat kaniya.
Malaumon usab si Palma og mabungahon ug mabulokon nga puno sa pagmahal ang pagsaulog sa Pasko. Subay niini, higpit nga bantayan sa kapolisan ang mga simbahan sa Romano Katoliko karong umaabot nga Misa de Gallo.
Sa Dakbayan sa Lapu-Lapu, si LCPO director PSSupt. Lemuel Obon miingon nga gawas sa pagbutang og mga polis sa mga simbahan may mga polis usab nga magpatrolya sa kadalanan uban ang mga barangay tanod.
Dugang pa niya nga bisan ang mga simbahan sa Isla sa Olango aduna gihapoy mga polis nga mobantay.
Samtang sa Dakbayan sa Mandaue bantayan sa mga polis ang onse ka mga simbahan. Aduna say mga polis nga magsakay og motorsiklo nga magsuro-suroy sa dakbayan aron mobantay sab sa kahapsay ug kalinaw.
Sa nasayran ang Police Regional Office 7 moisa ngadto sa full alert status sugod karong Disyembre 16 diin masinati ang pagsugwak sa daghang tawo nga mosimba. (Romeo T. Limpangog/DILT)(BANAT NEWS)