CEBU, Philippines — Si Ilocos Governor ug senatoriable Imee Marcos nagkanayon nga daghan na ang nahitabong kausaban sukad kaniadto bahin sa pagtoo nga ang Cebu usa ka "opposition country."
"In the old days, Cebu was considered an opposition country but that's only Cebu City. My father always won in Cebu Province," matud pa ni Marcos sa gipahigayon nga press conference kagahapong adlawa.
Matud pa ni Marcos nga daghan usab silang mga higala diri sa Sugbo apil na sila Cebu City Mayor Tomas Osmeña ug ang First Lady niini nga si Konsehal Margot Osmeña.
"It’s great, there is a great change. There is a sea of change in the psychology of Cebu or probably my attitude as well," matud pa ni Marcos sa dihang gipangutana kini kung unsay tan-aw niya sa pagdawat kaniya sa mga Sugbuanon sa iyang pag balikbalik og bisita dinhi.
Sa pikas bahin, si Marcos miingon nga angay suspensuhon og usa ka tuig ang Value Added Tax kay nakadugang kini sa kalisod nga nasinati karon sa katawhan.
Giawhag usab ni Marcos ang mga local government units nga tagdon ug atimanon ang mga senior citizens ug sun-on ang gihimo sa iyang probinsiya.
Matud pa niya ang mga senior citizens mahimo pang manginabuhi o motrabaho ug makatabang usab sila sa pagtudlo sa kabataan ilabi na sa natad sa kultura.
Sa pikas bahin, si Mayor Tomas Osmeña misalikway sa mga pagtuong duna nay “good relationship” ang pamilya niya ug ang mga Marcos.
“I’m just civil. I will never support a Marcos. No way,” sigon sa mayor.
Dugay nang naglanog-lanog ang oposisyon mayor ug ang ilang pamilya sukad pa kaniadto batok sa pamilyang Marcos.
Gani, usa ang mayor sa mga niprotesta sa paglubong sa patay’ng lawas ni kanhi Presidente Ferdinand Marcos sa Libingan ng mga Bayani.
“On behalf of the victims of a cruel dictatorship. That’s the least I can do,” matud ni Osmeña human gipangutana nganong dili siya mosuporta og mga Marcos. (Jean Marvette Demecillo/IBM)(BANATNEWS)