CEBU, Philippines – Patay ang usa ka ginang human kini gidungab sa iyang bana tungod sa kalagot nga nagsige kini og yawyaw kay nangita sa bunga sa saging alas-6:30 Martes sa gabii sa Lower Tubod, sa Dakbayan sa Toledo.
Ang biktima mao si Azucena Cular, 43, residente sa maong lugar. Samtang ang suspetsado mao si Marcelo Cular, 36, bana sa biktima.
Matud pa ni Police Officer 3 Bombino Enriquez, Desk Officer sa Toledo City Police Station base sa imbestigasyon gikasab-an sa asawa ang bana kay gihatag niini ang bunga sa saging sa tawo nga wala niini mailhi.
Tungod sa kalagot sa bana nga sige ug balik-balik og yawyaw ang iyang asawa nikuha kini og 12 pulgadas nga kutsilyo ug gidunggab ang iyang asawa sa makadaghang higayon.
Gidala ang biktima sa Toledo District Hospital apan gideklarar kining patay na ug ang doktor ni turnover sa kutsilyo nga naibot gikan sa lawas sa biktima.
Ang suspek mitahan dayon sa kapolisan ug kagahapong adlawa gipasakaan og kaso.
Sa laing bahin, usa ka Roland Omandam, 34, ang nalandig sa tambalanan human kini gitigbas sa iyang amahan tungod sa tanom nilang saging sa may Sitio Buntoran, Barangay Alpaco, Dakbayan sa Naga, niadtong Miyerkules sa hapon.
Samtang ang suspek mao ang iyang amahan nga si Rolando Omandan, 75.
Matud pa nga nagkalalis ang duha kay gikuha sa biktima ang bunga sa saging nga gitanom sa amahan niini ug tungod kalagot sa naulahi natigbasan niini ang anak. Ang biktima nalandig sa tambalanan. (/IBM)(BANAT NEWS)