CEBU, Philippines – Wala na kaagwanta ang mga residente sa Sitio Tiguib, Lagtang, Dakbayan sa Talisay sa ilang kahimtang human sila nanghiklin sa Tabunok Sports Complex.
Moabot sa 60 ka pamilya ang namakwit gumikan sa ilang kabalaka nga mapareho sila sa Tinaan, Siyudad sa Naga nga mabanlas ang yuta sa kabukiran gumikan sa padayong quarry sa QM Builders.
Niluwat og kamanduan si Mayor Eduardo Gullas sa pagsuspenso sa operasyon sa maong kompaniya.
Ang grupo nagpanon sa Talisay City Hall kagahapon aron sila matagad ug matabangan sa ilang suliran kay hangtud karon dili pa gyud kahatag ang siyudad sa ilang lugar nga kabalhinan.
Si Carmelita Mancao, usa sa mga residente, niingon nga lisud kaayo ang ilang lugar kay basin sila mangamatay.
Ang ilang evacuation center ang giingong labihan sab kainit sulod na sa tulo ka semana.
Si Bise Mayor Alan Bucao nibutyag nga ang naapektuhang pamilya dili magkahiusa kun unsa gyud ang ilang gusto.
“Naa may moingon nga kwarta nalang ang ilaha, naa say uban nga moingon nga relocation gyud ilaha,” matud ni Bucao.
Iya sab gitataw nga maayo ang pag-atiman sa mga namakwit sa lugar kay naa man ang buhatan sa City Social Welfare and Development (CSWD).
Nagduda si Bucao nga gisakyan sa politika ang isyu apan dili siya makabutyag kun kinsa kining mga tawhana nga nipahimulos sa suliran.
Apan si Mediosa Abatayo, usa sa mga residente, nihimakak sa pagduda ni Bucao.
Siya nagkanayon nga niabot sila sa City Hall aron madunggan sa mga opisyal kun naa ba gyud sila’y luna nga mapuy-an kay andam na sila mobiya sa ilang lugar nga peligro.
Niabot sa 60 ka pamilya ang nanghiklin sa unang semana apan nilabay ang mga adlaw namalik ang uban kay ang evacuation center pwerte’ng inita diin dunay nangasakit na.
Daghan pa gihapon ang nagpabilin kay dili mahimutang sa ilang sitwasyon. (/GMR) (BANAT NEWS)