CEBU, Philippines – Nangandam na ang kapolisan sa Rehiyon 7 alang sa kalag-kalag 2018 sunod semana.
Ang tigpamaba sa Police Regional Office 7, Supt. Reyman Tolentin, nagkanayon nga giplanohan nila nga mopakatap og 1,258 ka polis nga mobantay sa nagkadaiyang sam-ang sa rehiyon.
Plano usab nila nga mogamit sa 1,973 ka volunteer nga force multipliers aron moabag sa seguridad ug sa pagmando sa trapiko ilabi na sa mga dagkung sam-ang sa mga dakbayan.
Si Senior Supt. Royina Garma, direktor sa Cebu City Police Office, nitataw nga dili una sila mogamit sa ilang mga Barangay Intelligence Network (BIN) sa kalag-kalag sanglit wala pa sila mahuman sa ilang pagsala niini human nasayri nga daghang nagpailang nga sakop sa BIN nga giswelduhan sa kagamhanan sa Dakbayan sa Sugbo.
Usa na niini ang nadakpan nga si Jerry Lou Labra, ang armadong tawo nga giingong gitahasang mobantay sa Malubog survivor nga si Charmaine Puran sa Archbishop’s Palace niadtong Oktubre 7.
Buot ni Garma nga subayon kinsa kadtong mga aktibong sakop sa BIN sa CCPO.
Hinoon ang mga barangay tanod ilang patabangon sa kapolisan sa dakbayan sanglit kuwang gyud ang ilang pwersa.
Karong Oktubre 30 magsugod ang ilang soft deployment ug sa Oktubre 31 na sugdan ang full deployment sa kapolisan. (/GMR)(BANAT NEWS)