CEBU, Philippines — Usa ka lolo ug 11 ka adis-adis ang nasikop sa kapolisan sa Dakbayan sa Talisay sa may Sitio Mananga, Barangay Tabunok niadtong Biyernes sa hapon.
Si Supt. Marlu Conag, hepe sa kapolisan sa siyudad, niila sa ilang subject sa operasyon nga si Casier Cansancio Macaraya, 62-anyos, minyo nga nagpuyo sa maong lugar.
Matud ni Conag nga si Macaraya maoy usa sa mga durugista sa lugar.
Sa ilang paghimo sa operasyon nikagat kini sa ilang police decoy hinungdan nga nasikop ug nasakmitan og lima ka medium nga pakete sa shabu.
Ang laing nasikop nga naatlan nga nanuyop sa lugar mao sila si Allan Bacus Cansancio, 30-anyos, minyo nga taga Barangay Lawaan 3, Talisay City; Crisline Sarabia Fajardo, 22-anyos, nga taga Lorega San Miguel, Cebu City; Venel Dumlao Barro, 23-anyos nga nagpuyo sa Sitio Hawod, Bulacao, Talisay, City; Erlando Fernandez Genodipanon, 30-anyos, nga nagpuyo sa maong dapit; Tiny Rasolla Campo, 29-anyos, minyo nga taga Barangay San Isidro, Talisay City; Rolando Macaraya Racaza, 49-anyos; Dexter Carias Valendez, 37-anyos, nga taga San Isidro, Talisay City; Leemarich Crabuena Cañeda, 36-anyos, minyo nga taga Poblacion, Talisay City; Rey Natad Bartolabac, 38-anyos, taga North Poblacion, Naga City; Dennis Balacua Cabanilla, 39-anyos nga taga Cantabaco, Toledo City ug si Carlo Yanong Sabalones, 44-anyos, minyo nga taga Ward 3, Minglanilla.
Ang mga adis-adis nakuhaan og drugas ingon man drug paraphernalia samtang si Valendez ug Cañeda ang nakuhaan og armas nga wala’y napakitang lisensya.
Ang tanan gidala sa Talisay City Police Station diin gibalhug sa bilangguan samtang nagpaabot nga pasakaan og kaso. (/GMR)(BANATNEWS)