CEBU, Philippines – Gipahugtan sa Police Regional Office-7 ang seguridad sa Sugbo alang sa laing pagbisita ni Presidente Rodrigo Duterte.
Matud sa direktor sa PRO-7, Chief Supt. Debold Sinas, nga wala pa silay kasayuran sa petsa nga moabot si Duterte ingon man ang tumong niini.
Apan iyang giseguro nga duha ka adlaw una pa kini maabot, iisa nila ang ilang alert status ngadto sa heightened alert.
"Anytime mobisita si President, Team PRO-7 is always ready," si Sinas nagkanayon.
Samtang gibutyag sab ni Sinas nga niluwat og direktiba si PNP Chief Oscar Albayalde nga hingusgan ang ilang intelligence monitoring sa grupo nga nagpaluyo sa pagpamomba sa General Santos City.
Kini aron malikayan nga makasulod sila sa Sugbo ilabi na karon nga mobisita ang Presidente.
Niadtong Domingo sa udto taliwa sa pagpaubos sa tibuok Mindanao sa Martial Law niboto ang usa ka Improvised Explosive Device sa usa ka pharmacy duol sa Hadano Park sa Crossing Makar, National Highway, sa maong siyudad.
Niresulta kini sa pagkaangol sa walo ka sibilyan diin lakip niini ang usa ka 6-anyos nga babaye. (/GMR)(BANAT NEWS)