CEBU, Philippines — Niabot sa 44 ka sabongero ang nadakpan sa kapolisan sa Lungsod sa Minglanilla niadtong Domingo.
Sila si Chief Insp. Verniño Noserale, hepe sa kapolisan sa lungsod, ug kaubanan ang nihimo og sunod-sunod nga operasyon labot sa ilegal nga kalihukan.
Unang girumbo sa mga operatiba ang Lower Lipata diin walo ka sabongero ang ilang nakuha ug tulo ka manok nga igtatari ang ilang nasakmit.
Gilahos nila ang Sitio Little Baguio, Barangay Pakigne hinungdan sa pagkasikop sa 11 ka sabongero nga nakuhaan sab og tulo ka manok.
Samtang 25 ka sugarol ang nasikop sa Barangay Candulawan ug nakuhaan sab og tulo ka manok igtatari.
Matud ni PO3 Christopher Cesa sa Minglanilla Police Station nga swerte lang ang uban nga nakalingkawas sa kamot sa balaud human sila nakabantay sa ilang presensiya. Si Cesa niingon nga nagdasok gyud ang dinakpan sa ilang prisohan.
Gani sa iyang pagpakighinabi sa mga sugarol nagbasol kini sa pag-apil-apil sa maong ilegal nga kalihukan.
Gipakita sa kapolisan nga seryuso gyud sila sa tanang matang sa ilegal nga kalihukan maong ila gitambagan ang tanan nga mohunong na sa ilang bisyo aron dili magbasol sa kauwahian.
Ang tanang dinakpan ang gikatakdang pasakaan og kaso. (BANAT NEWS)