CEBU, Philippines – Gibantayan sa mga tinugyanan sa Cebu City Disaster Risk Reduction and Management Office ang Busay Elementary School ug Busay National High School sa pagsulod sa bagyong Ompong.
Matud ni Harold Alcontin, operations chief sa CCDRRMO, nga makig-alayon sila sa Department of Public Works and Highways alang sa pagsusi sa maong tunghaan tungod sa nidahili nga yuta.
Gitug-an ni Alcontin nga padayon ang ilang monitoring ug sukad pa sa niaging mga adlaw ang ilang pagpangandam sa bagyong Ompong.
Preparado na ang tanang ahensiya sa kagamhanan subay sa bagyong Ompong nga nakasulod na sa Philippine Area of Responsibility kagahapon sa hapon.
Matud ni Office of Civil Defense Director Concepcion Ornopia nga mas maayo nga tanan gyud tawo mag-andam aron malikayan ang posibleng kamatayon.
Ang nagkadaiyang ahensiya aduna nay standby nga kagamitan ug mga personnel.
Sa Dakbayan sa Mandaue, ang nagkadaiyang buhatan sa kagamhanan ang nipaalerto sa mga kawani pinaagi sa CDRRMO.
Giandam sab ang City Engineer’s Office ug Department of General Services (DGS) sa pagtubag sa emerhensiya alang sa paghatag og drainage flushing ug pagtubag sa mga pagbaha.
“Thankfully, over the last two years we have seen a drastic reduction in our flooded areas in the City of Mandaue but even then we want to make sure we are prepared for the worst anytime,” matud ni Mayor Gabriel Luis “Luigi” Quisumbing.
Sa Dakbayan sa Lapu-Lapu maoy gihimo ang pag-alerto sab sa kabarangayan nga nahimutang sa daplin sa kadagatan.
Samtang pakigtagboan sa mga opisyal sa Dakbayan sa Talisay si Weather Specialist Engr. Oscar Tabada sa PAGASA aron klaruhon ang estado sa bagyo.
Si Alvin Santillana, pangulo sa Talisay City DRRMO, niingon nga mas maayo nga gikan ni Tabada ang katin-awan aron dili maglibog ang katawhan o maalarma.
Hinoon andam na sab sila panahon nga moigo ang katalagman diin kadtong nagpuyo sa kabukiran, kasapaan ug kabaybayonan ang gipahimangnoan na nga magmatngon ug mohiklin kung sila mameligro.
Ang Cebu City DRRMO sa ilang bahin mopahigayon sab og disaster preparedness training sa mga kawani sa City Hall.
Ang pangulo sa CCDRRMO, Nagiel Bañacia, niingon nga niumol siya sa maong ideya aron pag-edukar sa mga kawani kung unsaon pag-handle sa kalamidad.
“Mao na atong objective to make City Hall resilient to any disaster and ready for emergency. It’s very important, ilabi na daghan ta og client nga mag-transact og business sa City Hall,” matud ni Bañacia.
Nunot sa bagyong Ompong, si Bañacia daan na nga niawhag sa publiko nga mangandam. (Romeo T. Limpangog, Gabriel C. Bonjoc ug Decemay P. Padilla/GMR)(BANAT NEWS)
Related video: