CEBU, Philippines — Padayon nga masinati ang madag-umon nga panahon sa Kabisay-an hangtod karong adlawa tungod sa nikusog nga hanging habagat dala sa bagyong Maymay nga nakagawas na usab sa Philippine Area of Responsibility (PAR).
Ang Philippine Atmospheric Geophysical and Astronomical Services Administration (PAGASA) adunay laing gi-monitor karon nga weak low pressure.
Masinati gihapon ang pagpanag-om ug panagsa nga pag-ulan-ulan sa Visayas ug ubang bahin sa Luzon ilabi na sa kasadpang bahin human nga padayon usab gipakusgan sa bagyong Jebi ang hanging habagat.
Si Jebi nga nakasulod sa PAR niadtong adlaw’ng Domingo diin gitawag kini og bagyong Maymay kagahapon sa buntag nigawas na kini sa PAR, matud ni Engr. Oscar Tabada, pangulo sa PAGASA Visayas.
Ang intensified habagat magdala og balod diha sa kadagatan hinungdang kinahanglan gihapong magmatngon ang mga mananagat ug dili angay usab molawig ang mga sakayan pandagat.
Matud ni Tabada nga lakip sa gi-monitor nila karon mao ang weak low pressure area nga posibleng mosulod sa nasud karong Biyernes ug adunay posibilidad nga mahimong bagyo.
Dugang pa ni Tabada nga ang bagyong Jebi posibleng makamugna og LPA diha sa amihanang parti sa Luzon. (BANAT NEWS)