CEBU, Philippines – Mapasalamaton gihapon si Talisay City Mayor Eduardo Gullas kang Presidente Rodrigo Duterte bisan gihinganlan ang iyang dakbayan nga adunay daghan drugas tungod kay matinud-anon kini.
Apan giklaro niya nga wala masayri sa presidente nga adunay panaghiusa ang kapolisan ug ang lokal nga pangagamhanan diin niresulta sa pagkasikop sa mga nalambigit sa ilegal nga drugas ilabi na kadtong adunay mga warrant of arrest.
Sumala pa ni Gullas nga sa pagkakaron nagpaabot siya sa official report nga iduso kaniya sa kapolisan may kalabutan sa nagpadayon nga operasyon lakip sab kung pila na ang gidaghanon sa mga nadakpan ug sa mga nasakmit nga kontrabando.
Gitug-an ni Gullas nga sa 70 nga nadakpan sa kapolisan sa nilabay nga mga operasyon, 15 lang niini ang Talisaynon hinungdan sa iyang daku nga kahadlok nga nahimo na nga merkado sa shabu ang Barangay Tangke.
Nunot niini makigtigum si Gullas sa mga kanhi ug bag-ong opisyal sa barangay aron doblehon pa ang lihok batok sa problema sa ilegal nga drugas ug unsa man ang rekomendasyon sa pagsumpo niini. (/GMR)(BANAT NEWS)