CentCom: Way terror threat sa Sugbo

CEBU, Philippines – Motabang ang Armed Forces of the Philippines Central Command (AFP-CentCom) sa PNP pagpalawom sa  imbestigasyon kalabot sa nadakpang gidudahang miyembro sa Abu Sayyaf niadtong Huwebes sa kaadlawon didto sa Barangay Ocaña, Siyudad sa Carcar. Si Colonel Medel Aguilar, tigpamaba sa CentCom miingon nga mohimo sila og komprehensibong imbestigasyon. Si Oger Roma Pelonio, 69, taga Sultan Kudarat sa Mindanao gisikop sa Criminal Investigation and Detection Group (CIDG) -7 human makuhai og mga armas, rifle grenades, C4 explosive, aerial map sa Cebu City, lima ka cellphones ug usa ka Koran.   Gihimakak ni Pelonio ang pasangil.

Ang pagkasikop ni Pelonio nahitabo pila lang ka adlaw human nipagawas og travel advisory ang nasud sa UK sa ilang mga citizens sa paglikay sa pagbiyahe ilabi na sa habagatang bahin sa Sugbo.

Giklaro ni Aguilar nga walay angay ikabalaka sanglit walay terrorist threat ang Sugbo apan wala sila mokompiyansa. (/IBM)(BANAT NEWS)