CEBU, Philippines — Gihulagway ni Gobernador Hilario Davide III nga “hilarious” o kataw-anan ang pasangil ni kanhi gobernador ug karon Kongresista Gwendolyn Garcia nga politika ang hinungdan nga gibasura sa Ombudsman ang iyang motion for reconsideration kalabot sa kasong pagtambak og yuta sa kontrobersyal nga Balili property nga walay pagtugot sa hunta probinsiyal.
Si Garcia nagkanayon nga wala na siya masurpresa sa desisyon sa Ombudsman sanglit dili gyud mohatag og patas nga desisyon si kanhi Ombudsman Conchita Carpio Morales sa iyang kaso.
Kini gumikan sa kasuod niini ngadto sa amahan sa gobernador nga si kanhi Chief Justice Hilario Davide Jr.
Si Garcia nagkanayon nga iyang atbangan si Gob. Davide sa gubernatorial race sa Lalawigan sa Sugbo sunod tuig.
Dugang ni Garcia nga ang pagbasura sa iyang motion naghatag og kalibog sa publiko.
“The intention to sow confusion among the public is evident in how the denial is now being twisted and presented as an alleged bar against by running for governor next year. This is patently misleading,” matud ni Garcia.
Si Davide sa iyang bahin nagkanayon nga si Garcia nibasol sa laing tawo sa iyang kapalpak.
“The trouble with her, she blames other for her folly except herself,” matud ni Davide.
Wala na mohatag pa og komento si Davide ug nagkanayon nga dili na siya mopatol pa sa mga banat ni Garcia batok kaniya. (BANAT NEWS)